Wasa6y: عنده مليون شركة و مو بس بالكويت بكذا دولة وكلهم شركات كمبيوتر وتسويق الكتروني وإعلانات و راح يصير امبلتع وااايد والسانه طوييل وبس يمشي ويشخط بالموظفين إلي عنده وما يتواجد وايد بالديره كله مسافر ولازم تاخذون منه موعد عشان تقابلونه أو تكلمونه وراح يكون رجل أعمال معروف وبس تشوفونه بالجرايد وتقولون يحليله هذا كان مدير موقع منتديات الوسط , وأملكم يعطيكم ويه لأن بيشوف نفسه وايد وراح يسكر المنتدى ويخليكم تولون.

DCiawy: عنده محل سيارات تصليح وتأجير و مسكين لاهي مع مرته وعياله ويحب عايلته وايد لدرجة ان ما يصدق متى يخلص الدوام عشان يرد البيت ويجابلهم لأن يحليلهم عايلة مثالية متفاهمين وايد و كل يوم عندهم موضوع يتناقشون فيه وعياله مشالله معودهم يناقشون من واهما صغار و فيكم خير تقولون حق واحد بس كلمة يرد عليكم ابعشر .. ونوعه كل سنة يرشح نفسه حق انتخابات مجلس الأمة بس ماكو فايده عمره ما وصل المجلس بس عنده أمل وقاعد يحاول يقول يا انا اهما,

Smart: القدر يلعب لعبته ويصير وزير التربية ويطيحله قرارات تعسفية بالطلبة المساكين, ويقعد يحط دوبه ودوب هالمدرسين ويتصيد عليهم وكل يوم راز ويهه بمدرسة من المدارس بدون لا يدرون وامبهدلهم آخر بهدله .. والطلبة الحين يقولون الله ياخذ نورية بعدين ينامون يقعدون ياكلون يشربون واهما يدعون علي سمارت لكن ماكو اهوا لااصق بالكرسي و ما يتحرك وطبعا بيغير النظام التعليمي بتشوفون شغلات غريبة عجيبة وترا عادي أي شي ما يعجبه يصوره وينشره بالمواقع والمجلات ويتحلطم لين يقول بس .. طبعا كله باسم مستعار عشان محد يستوجبه او يطرح الثقة فيه ;p

Abdullah: بيصير مدرس اجتماعيات ولكن انسان عصامي جدا جدا وبياكل تهزيء من سمارت لأن بينهم ثار قديم و عبدالله من النوع الي ما يعجبه العجب وينتقد كل صاحب منصب وماكو أحد عاجبه والوضع في الديره كلش مو عاجبه و وده يغير الأوضاع وزاهق الدنيا بللي فيها ويحاول يزرع مفاهيم غريبه عجيبة في عقول الطلبة لكن عمك أصمخ معطيينا طاف قوي لكن اهوا مو هامه لان اهوا يشوف ان الي يسويه كله صح وكل يوم مقدم شكوى للوزير بس محد يشوفها ولا يطلون فيها وهالمسكين كل يوم ناقلينه من مدرسة لي مدرسة لان مو عاجبهم.

Pure: راح تشتغل باحدى الوزارات ولأن طبيعتها وايد تستحي راح تختار وزارة صخه ومكتب على الزاوية وتدش وتطلع على كيفها و مو ساءله على أحد وآخر شي تتزوج واحد من المراجعين في الوزارة وتعيش أحلى عيشه اهيا وياه واتييبله عيال وتكون لها خوش اسرة وحياتها مستقرة جدا جدا

وسطية الحقوق: كله مختبصه وتحاول تحل مشاكل المرأة ومن جمعية نسائية لي ندوة ثقافية لي المحكمة تحل مشاكل المطلقات وترد البيت هلكانة وماكو الشغل وراها وراها وطلبة الجامعة يدقون عليها تكفين تعالي سويلنا ثقافية حق وسط الحقوق وتروح وتسوي الثقافية وحجي قديم كله معيود وتحاول تثقف فيهم بس ماكو امخوخهم سكرااب وتطلع منهم واهيا زعلانة على حالهم لكن تقول ما عليه نحن نور لا يموت وتحاول تناضل طول عمرها .

MARSHAL: متزوج وسطية وماكو اهوا وياها دنيتهم كلها وسط بوسط ومشاكل الكويت وتعليق على علان وفلنتان ويحاول كثر ما يقدر يخلي عياله يحبون الوسط ويزرع فيهم هالشي من واهما صغاار حتى لدرجة بيتهم لونه اصفر واسود وكل طوفة مكتوب شعار من شعارات الوسط ( نور لا يموت , ضد كافة أشكال التعصب والتميير, زمالتنا ليست فساد ..... الخ الخ ) ياكلون وسط ويشربون وسط وينامون وسط حتى لما يروح الدوام يقعد يسولف مع ربعه عن الوسط يقولون له بس يبا تخرجنا وانت للحين يقول ماكو الوسط بدمي .. انا الوسط والوسط انا ;p

حقوقية: بتتزوج واحد لبناني يشتغل بمانغو الفنار ولا زارا مرينا وكله تغار علييه من الصبايا الحلويين .. وما عندها سالفة غير ريلي وريلي جنه محد تزوج غيرها وكله يدلعها و معيشها عييشة عالبساطة البساطة يا عيني عالبساطة .. وماكو بس اهيا تصرف عليه خو اهيا محامية تطلع ذهب واهوا منتف مسكين معاشه ياله يكفيه يشتري موس حلاقة ويعدل شعراتوو الشئر ;p

Aldolf_whab: راح يفتح له ورشة تصليح سيارات وعنده خوش ستاف بنجرجية لكن عيبه ما يصلح الا ألماني وبس عاد كيفكم ياباني أمريكي روحو المحل الي يمه (محل ديسياوي) .. وكل يوم صاك هوشه مع ديسياوي وآخر شي يرضون وما جنه صار شي لأن أدولف بسرعة يستسلم ويروحون القهوة ويطيحوله حش بحريمهم

كظماوي: متزوج 4 وحالته حاله كل يوم عنده وحده و مو خالص وعنده عيال وااااااااااااااااااااااااااايد ومسوي خوش منتخب كظماوي وحق جميع الألعاب يعني كل بيت شي .. تدشون بيته تشوفون الكل لابس تي شيرتات كاظمة حتى الخدامة والسايق والطباخ, وامخرع البيت كله كلمة وحده ما تصير ثنتين من يدش يصرخ صرخة وحده كلهم يصفون جدامه ويشخط فيهم حتى لو مو مسوين شي بس ما ينلام لأن وايد لويه عنده وعلى فكرة كلية العلوم ازهقو منه مو راضي يتخرج واطردوه وآخر شي قام يشتغل بنادي كاظمة اييي بيصير لهم خوش مستقبل واهوا بيشغلونه باحدى الوظايف الخايبه .. بعد يالله يقدر يصرف على الورعان الي عنده ;p

أنفال القلاف: ماراح تعرفونها كلش بتصير مغنية وتغني أشعارها وعندها شركة أنفال سنتر للصوتيات والمرئيات وعندها محل تسجيلات بخيطان (مادري ليش ;p ) وكل يوم نشوف صورتها بالصفحة الفنية يا عندها أمسية شعرية يا عندها حفلة بمهرجان جرش يا عندها مقابلة مع قناة روتانا وآخر شي بيتزوجها الوليد بن طلال بس لا تقول حق أحد لأن تخاف من العين ;p

حقوقية%وسطية: بتتزوج واحد من الفحول الي بكلية الحقوق وبيفتحون لهم مطعم سندويشات بالصبية وبس اهيا وياه ياكلون منه, وراح تسوي مشروع سفريات بس شراكة بينها و بين الفحل الي متزوجته وعاد استانسو تذاكركم وسفراتكم ورحلاتكم كله عليها .. و شسمونه وسطي طبعا بيستانس لان وايد يسافر فكل شي عليها بس يقولها ألو حجزيلي على الساعة 12 بروح السودان اييب شواذي .. اهيا ماكو على طول جك جك جك بالكمبيوتر وتحجز له حتى التذكره توصلها ليييه الجوازات بالمطار اهوا ما عليه الا يشيل قشه ويروح ويلقى شغله خالص.

Aw7ad: حياته مملة كلها روتيين واهوا متشائم وشايل الدنيا على راسه وعباله كل شي غلط بالدنيا اهوا الي مسويه وفاتح له مكتبه صغيره بالقادسية فيها كتب تعلم انجليزي وفيها قصص خيال علمي وماكو اهوا قاعد مع هالكتب الداثرة و 24 ساعة يقرا ومحد يشتري منه آخر شي بتصير مثل مكتبة الربيعان الي باع الكتب الي فيها.

Al-sarraf: بيتزوج وحده فيها كل المواصفات الي يبيها ملتزمه ومحتشمه وما تسمع أغاني وكافيه خيرها شرها و ما تطلع ولا تروح ولا اتيي و مو مكمله دراستها حدها ابتدائي و اقطعت وماتعرف شي بالدنيا ومتخلفه بس تعرف تطبخ واتييب عيال ويايبتله فوق ال100 ياهل وكل ما يقولها بس مانبي واهيا ماكو شغاااااله جنها مكينه واهوا امضيع ال off .. وفوق كل هذا كل يوم يقولها يا مره تغطي يا مره احتشمي يا مره لا تتكلمين مابي اسمع صوتج لان صوت المره عوره يا مره عيب اتطلين من الدريشة يا مره ليش تبوسين ولدج عييييييييييييييييب وماكو كل يوم امداحر وبيتهم ما فيه تلفزيون ولا ستلايت حتى الراديو الي بالسيارة بلحظة غضب لان مرته كانت قاعده تسمع نشرة الأخبار والي يقولها مذيع جان يكسره وبعدين قال لا للاختلاط .. نعم للتعليم المشترك ;p

جلنار: راح تتزوج واحد سكانه مرته تقوله يمين يروح يمين تقوله يسار يروح يسار .. ويسمع كلامها بكل شي وكل يوم زافته .. وصار علماني غصبا عليه من كثر ما يجابلها .. و ولد ديسياوي الصغير بالمدرسة الي تدرس فيها جلنار وبيوم راح البيت وقال حق ابوه ان ابلة جلنار تقول الرجل متخلف وعطتنا أعلام مكتوب عليهم لا للرجل نعم للمرأة!!! ديسياوي عصب وراح زفها وقالها شلوون تعلمين اليهال جذي .. هذيل يهال شنو ذنبهم .. وماكو جلنار راسها يابس ومتمسكه برايها .. حتى ريلها خلته يقول ويييييييييع الريايييل حجر عثرة في طريق التقدم والتطور .. واهيا بعد من رواد الجمعية النسائية الي تشارك فيها وسطية الحقوق بس مو متفقين كلش حتى واهما بنفس المكان كله بينهم هوشات وأفكارهم متناقضة.

Azzurri: بيهد كلية العلوم ويسافر ايطاليا لان المنتخب هناك طالبين قولجي وما لقو أحس منه جان يفضل يقعد بايطاليا على الدراسة بجامعة الكويت المخرفه وعاش هناك وصار مشهوور وعنده فلوس واايد ومشالله عنده قصر بايطاليا ومحد يحاجيه وتزوج ايطاليه وما قمنا نشوفه الي بالجرايد بعد والي يبييه يروح له ايي ويقولون صار متين من كثر ما ياكل بيتزا J

Saloo7: الفنان خالد البريكي يكون عنده مسلسل مهم حق رمضان واذا ما نزل هالمسلس راح تخترب الدورة الرمضانية ومسكين خالد واهوا راد من موقع التصوير الي بالوفرة يصيرله حادث ويقعد بالمستشفى ما يقدر يتحرك والمخرج يتوهق ما يدري شيسوي يبي بديل ومو لاقي عاد أنفال مو عندها شركة أنفال سنتر؟ المهم تقوم فجر السعيد الي عندها شركة سكوب سنتر وتدق على أنفال وتقولها تكفيين ما تعرفين احد نقدر نحطه مكان خالد وشوي فيه شبه منه تقولها ايييييييي ماكو الا صلوح ويقومون ياخذون صلوح ويعلمونه شلون يمثل واهوا مسكين مخه مو صوب التمثيل وفجأة يطلع صلوح بمسلسل برمضان ومحد يحس ان هذا مو خالد البريكي ومن يومها يشتهر صلوح وينسون خالد البريكي وكله ياخذون صلوح حق الأدوار المهمة ويصير خوش ممثل حتى هولوود يطلبونه يمثل مع جوليا روبرتس فيلم رومانسي ويصير اهوا ثاني عرب يمثل مع الأجانب بعد عمر الشريف طبعا.

طموحة مملوحة: من كثر ما الطموح شاقها بقدرة قادر يختفي كل الطموح لأن تتزوج واحد يقتل كل أنواع الطموح تقوله تعاال دش منتدى الوسط خل نتناقش ونشارك وأعرفك على ربعي الحلوين صلوح وحمود ودنيا ومنيا ... يقولها ماكو منتدى وخرابيط انتي شفيييج ؟؟ كتى تكبرين على هالسوالف؟؟ تقوله ايي بس انا وسطية واحب الوسط ولا تنسى اني مسؤولة الطالبات!! يقولها هذا قبل الحين انتي مرتي وبس والمره لازم تسمع كلام ريلها .. لكن طموحة القوية ما تسكت له ومع المحاولات العديده اقدرت انها تخليه وسطي ويحب الوسط صج ان مو فاهم شنو وسط بس يالله مو مهم .. المهم ان وسطي والسلام لان كلنا اهيا تحب الوسط والكل لازم يصيرون وسطيين وبجذي تثبت مسؤولة الطالبات انها قدها وقدوود ;)

عذوب: تطلبها احدى المجلات الفنية ان تمسك رئاسة التحرير وطبعا اهيا ما ترفض العرض لان هالايام ماكو شغل .. المهم وتشتهر عذوب مع ان نص المواضيع مبيوقه من المجلات الثانية بعد شتسوي هذا الموجود لكن فجأة تطيح عليها المحامية حقوقية وترفع عليها قضية وتتبهدل عذوب بالمحاكم وبين سين وجيم تطلع براءة لأن حقوقية خانها التعبير ولهت بريلها بو شعرات شئر وبجذي ضاعت حجتها وجان تفتك عذوب بس أول ما اطلعت راحت ونزلت موضوع طويل عريض بمجلتها ان المحل الي يشتغل فيه ريل حقوقية كله ماركات تقليد والأسعار نار مادري على شنو وكلتها عدل حقوقية لا من الوظيفة ولا من الزلمة اللبناني.

A7la 7elwa: بتتزوج واحد غني وتحن عليه يفتح لها صالون ويفتح .. تحن عليه اييبلها bugatti و مسكين اييبها لان وااايد يحبها شايفها و مو شايف غيرها .. وتحن علييه اييبلها بيت ظهر وبطن وعلى شارعين واييبلها وتحن عليه ايبلها شاليه ومزرعة وطراد ويخت وجيتيك سي واييبها لان بس يبي رضاها .. المهم راح اتنتفه عدددل وكل يوم سفرات وروحات ويايات ولا بالأحلام لاعبين بالفلوس لعب ;)

Kyano: بيفتح شركة تسويق واعلانات بلبنان وعلى الجبل وبيتزوج لبنانية تصير اخت ريل حقوقية .. وكله حياته حب بحب وكل يوم يكتب لها شعر ولا خاطره ويتغزل بعيونها الحلوة وينسى الدنيا ومافيها .. والجو حلو والمكان رومانسي بعد خلاص ما يرجع كلش وما تشوفونه ;p

وسطي_ليبرالي: راح يؤلف كتب واااايد لكن راح تمنع من الكويت عاد راح يضطر ان يهربهم ويبيعهم بره .. راح يشتهر بره وايد لكن باسم مستعار وبيحاول ينشر فكره في اماكن تقدر ما يدعو له وسطي ليبرالي .. حياته صعبة وراح يواجه وايد مشاكل بس راح يتعود /:

كويتي من العاصمة: بيكون واحد من قاعدة حزب الله وحياته كله حرب ودمار ودم وذبح وقتل لكن اهوا اختار هالشي ويفكر بالشهادة.. وبعدين يرد الكويت ويسوي حزب حقه بروحه ويبدي عمليات ارهابية متنوعة واهوا العقل المدبر والمنفذ بعد وينشر الرعب في الديره ويصير وحش العاصمة مو حولي ;p

Salomo: بيصير ابن بطوطة كل يوم من ديره لي ديره والله يعافي سفريات حقوقية%وسطية تحجز حق كل الاعضاء ما عندها مشكلة وبعدين ريلها رفيج سلومو أيام الحقوق أي عاد امضبطيله الوضع عدل ما يحاتي شي كل يوم تشوفونه بديره والحقوق ماخذها هواية اذا ضاق خلقه مسك له جم قضية ترافع فيها وما همه المتهم طلع براءة اعدام حبس جناية جنحة الي اهوا المهم وناسته وبس .. انسان راهي عايشها على مزاجه ;)

عبدالله جواد: بيصير مذيع بقناة المنار وصوووته حده يلوع الجبد بس شيسوون ما لقو غيره واحد قرقه ويقط قطات قوية ويصروخ على كيف كيفكم ويشد المشاهد لان شيسوون ماكو احد يتابع برامجهم فقالو ماكو الا عبدالله اهوا المذيع المنقذ وصارو كل الناس ما عندهم الا قناة المنار يتابعونها ويتطمشون على سوالف عبدالله الفصلة .. ماكو شي عاجبه يقط سالفة وينسى شنو قال ومرة يتكمل عربي وفجأة انجليزي أي بعد خريج أمريكا لا تلومونه .. تخرج وعباله بيلقى وظيفة بالكويت ولا محد عطاه ويه الا المنار .. هم زين عبييدو ;p

Thuglove: بياخذونه برنامج فكر واربح حق رمضان لأن ملو من المذيع المعتاد بس الاسئلة شنو صعبة شنو محد يعرف يجاوب شنو الواحد يعرق واهوا يفكر يجاوب شنو الاسئلة مادري من أي عالم .. ويفوز بأحسن برنامج بجائزة الميوزيك اوورد (مادري شكو) ويشتهر مذيعنا وباليوم الي بيستلم فيه الجائزة يقول كل الفضل يرجع حق مكتشفة المواهب sabhlala الي الكتشفت ابداعات أيام المراهقة وتحديدا في منتديات الوسط وبموضوع alwasat chat وينادوني والكل يصفق وانا ايبب وراح اكون خلاص فقدت كل قواي العقلية لان تحديدا سبهلله بتكون صارت من حفريات كلية الحقوق وبيحطولها تمثيل بعد أحلى من تمثال صدام وكل مستجد يدش الحقوق يطق لها تحية شكر وولاء للمناضلة Sabhlala ;p

وجــــــــــــــــان بـــــــــــــــــــــــــس!!

وأتمنى محد يزعل مجرد تخيلات مالها معنى وكلها خزعبلات .. وانشالله كلكم تكون حياتكم حلوة والله يوفقكم وناطره تعليقاتكم ;)

التعليقات (0)

إظهار/إخفاء التعليقات